Kisa ki ka pouse w rekwè nan lanmou ? Dekouvri Madombé Still…

Kisa ki ka pouse w rekwè nan lanmou ? Dekouvri Madombé Still…

‍Emisyon rakousi ki pase sou tout platfòm Banj Media yo chak vandredi nan lè 4è pou 5è nan aswè a, te kontan resevwa Madombé Still jou ki te vandredi 23 fevriye 2024 la. Carl Edens Pierre ak Filisner Dieujuste ki se de (2) lengwis ki anime show a te louvri mikwo bay atis la nan lide  pou devwale bay gran piblik la mesaj ki kache anndan tèks sa a pandan yo t ap dekòtike estrikti ak kontni ki chapante mizik la. Si w pa t ap koute, w ap jwenn tout emisyon an nan lyen ki anba a. Annatandan, men kèk mo pou rezime lavi ak zèv atis la.

‍Biyografi atis la

Madombé Still se yon jèn talan ki fèt nan lokalite Mapou, 7yèm seksyon kominal Bèlans nan Sidès peyi d Ayiti nan lane 1999.

Tandiske l te gen sèlman 5 lane epi te deja tanmen etid klasik li nan lekòl Sainte Thérèse de l’Enfant Jésus (Sent Terèz), katastwòf natirèl gwo van lapli ak move tan ki te tonbe sou peyi a nan dat 23 ak 24 me 2004 yo ta pral fè paran l rantre Pòtoprens avè l. Se la li t al rapousuiv etid klasik li nan nivo fondamantal nan lekòl Institution Mixte Michel Dorcas (Enstitisyon Miks Michèl Dòkas) epi etid segondè li nan Lise Anténor Firmin (Antenò Fimen).

Papa l, Philoclès Madombé (Filoklès Madonbe), te deja ap milite nan mond atistik la nan òganize sware mizikal nan lakou Mapou epi te konn fè ti aktivite DJ. Men, nan menm peryòd sa a, Madombé ta pral pèdi papa l. 7 lane aprè, Rosette Morlan Madombé (Wozèt Mòlan Madonbe) ki se manman l, ta pral, li menm tou, fè vwèl pou peyi san chapo. Erezman pou li, li te jwenn bon jan sipò fanmi l ki te ede l grandi.

Nan lane 2014, Madombé devlope lanmou ak pasyon pou mizik epi deside al aprann jwe pyano nan sant aprantisaj Inspiration Music School. Sou konsèy youn nan fòmatè li yo, Madombé tou pwofite aprann epi devlope talan chantè li yon lane aprè.

Aprè etid klasik li, Phabio Rodney Madombé rantre INAGHEI (INAGE) kote l al pran yon diplòm nan syans kontab. Jounen jodi a, Madombé, anplis mennen yon lavi atis nan pwodui mizik, ap travay nan Direksyon Jeneral Enpo (DGI, an fransè) nan pòs verifikatè.

‍Yon ti rale sou zèv atis la

Madombé Still lanse karyè mizikal li nan lane 2018 avèk yon mizik  li te mete deyò ki titre : « Yon lòt Ayiti posib ». Li chante mizik sa a an kolaborasyon avèk Avelo epi Newton Previlon. Nan yon lòt mizik li ta pral pwodui an solo aprè, atis la voye yon ochan bay fanmi li ki te akonpànye l pandan  moman sonm li yo. Mizik sa titre « Nou ». Aprè sa, atis la chante lanmou nan 2 trak li bay pote tit : « Mwen vle w » ak « Ange du paradis » epi li pibliye yon lòt moso ki batize « Lavi sa a ».

Nan fen ane 2023 a, chantè a pibliye dènye mizik li ki gen pou tit « A vie ». Nan mizik sila a, Madombé Still  fè lanmou reviv nan yon kè ki te pèdi lafwa afòs yo t ap maltrete l.

‍Prezantasyon mizik « A vie » 

« À VIE », se yon Konpa kote atis la ap eksprime lanmou l, yon lanmou sensè pou yon fi ki nan vi l. Mizik la pote 2 kouplè, refren epi bridge + outro.

« À VIE », se yon dyalòg kote depi nan premye silab yo, MADOMBÉ ap fè fi a konnen tout sa li reprezante pou li. Pou n reprann mo otè a, fi sa a se yon « trezò ». Avèk limenm, nan lavi l gen yon avan e gen yon aprè. 

Pou  MADOMBÉ, nan tèks la, ki te konnen move eksperyans nan lanmou, fanm sila a se yon game changer. Se yon coach ki gen pat li sou ekip la, tankou jounalis espò yo ta di.

Boutofen, « À VIE », se yon tèks k ap eksprime lanmou e ki vini avèk pwomès tou. Aprè tout bèl pawòl otè a met atè pou l di men ki kalte lanmou li jwenn, san anbigite, li di pa gen anyen k ap ka elwaye l de fi sa a.

Filisner Dieujuste

‍